بدأنا في الحديث مع محمد عن قصة اختيار مارفل له. وذلك بعد أن عرض وكيله الخاص المشروع عليه وقرأ نص الحلقة الأولى, قرر دياب اللحاق بتلك الفرصة الذهبية والتي تتطلب منه كتابة العرض الأولي الذي وصل إلى 200 صفحة في غضون أسبوعين فقط. وصل محمد إلى المراحل الأخيرة من الاختيارات, إذ كان من بين ثلاثة مخرجين آخرين سيقدمون أفكراهم لرئيس إستديوهات مارفل كيفن فايغي. استطاع محمد الحصول على فرصة العمل على المسلسل الطموح. تطرق المخرج خلال حديثه على الصعوبة الأبرز في العمل مع إستديوهات مارفل.
"الصعوبة بقا هي لما تعمل أفلام مستقلة أنت بتبقى كل حاجة. أنا كنت أعمل اللي أنا عايزه. أشيل مشاهد, أغير النهاية, أغير البداية, أعمل اللي أنا عايزه ومحدش يقدر يقولي حاجة. المنتجين في المشاريع المستقلة آرائهم استشارية. لما تروح بقا لنظام الإستديوهات, عبارة عن لجنة أنت عضو فيها, فكل قرار لازم كل اللجنة توافق عليه. فأنت بقت شغلتك أنك تقنعهم والموضوع صعب جدًا. خاصةً أنهم عاملين قبلك 28 مشروع"
Marvel Studios
وبالتأكيد تحدث محمد دياب عن تجربة تعامله مع رئيس إستديوهات مارفل وأحد أهم الأسماء في تاريخ هوليوود كيفن فايغي. إذ ذكر بأنه جاد في عمله بشكل لايصدق:
"التعامل مع كيفن كان مفاجئة. أنا قلت إني حشوف كيفن مرتين ثلاثة. كيفن فايغي ده مش شخص طبيعي لأنه في كل اجتماع كان موجود, في كل اجتماع حول النص كان موجود, بنتكلم عن الممثلين الكومبارس موجود ويبعتلي إيه رأيك في ده, طب لا ده حلو. نتكلم في الأزياء اللون والشكل, تدخله ووجوده في كل حرف لا تتخيله. أنا كنت مذهول انه فيه إنسان يقدر يشتغل على عدد المشاريع دي بنفس الوقت"
تلك الصعوبات التي واجهها محمد في إقناع اللجنة أدت بأنه حصل على أقل من %80 من رؤيته في العمل وذلك يعود لنظام الاستديوهات المختلف. من الاسئلة الكثيرة التي كانت في أذهاننا هي مدة المسلسل وكونها ست حلقات فقط, هل كانت هي خيار أم فُرض ذلك على المخرج؟
"مارفل محدداه من أول يوم. مشاريع مارفل المسلسلاتية عاملاها ست حلقات كلها ماعدا مشروعات خاصة مثل WandaVision. القالب الإعتيادي هو ست حلقات. لوكي هو المسلسل الوحيد اللي قايلين انه جزئين. طريقة مارفل مش الطريقة الطبيعية انه المشروع نجح فأنا أقولك يلا هنجدد لموسم ثاني. هو الموضوع بدماغهم ناجح مانجحش أنا عندي خطة"
 |
| Marvel Studios |
وأضاف بخصوص انعكاس تلك الخطط على مستقبل Moon Knight :
"كل حاجة سرية, لحد دلوقتي أنا معرفش ايه مستقبل Moon Knight. لو حتسألني أنا فاعتقادي انه حينضملعالم الأفنجرز. أنا بفتي. دي مش معلومة بس ده توقعي"
تحدثنا بعد ذلك عن الشخصيات التي كان يتمنى محمد جلبها للمسلسل وأجاب:
"كان عاجبني أوي لو عملنا شخصية هالك. عارف ليه؟ لأن هالك عنده شخصيتين. ومون نايت عنده شخصيتين. فتخيل انه ممكن الاثنين يبقو صحاب وتحدث لخبطة إنت صاحب ده ومش طايقك. العلاقة الملخبطة وانه مين ممكن يبقى صاحب مين من الأربعة"
وخلال حديثنا عن الاحتمالات, أردنا أن نعرف ماهو أكثر شيء يود دياب العودة لاستكشافه في الموسم الثاني إن حدث؟
"أنا شخصيًا اللي أنا كنت هموت وأعرف هو حيعمل ايه ودي قصة كل واحد من اللي بيشتغلو عنده تخيل ليها هي الشخصية الثالثة لما يتواصل معاهم هيبقو عاملين ازاي. اللخبطة الثلاثية اللي بينهم هتبقى عاملة ازاي. هم بدأوا التعود على بعض وده شكله مصيبة ثانية خالص, شكله ده السفاح اللي فيهم"
 |
| Marvel Studios |
لا تخلو تجربة أي مخرج من التعامل مع أبطال العمل, وفي مسلسل Moon Knight, يتعامل محمد مع أحد أكبر الممثلين في هوليوود أوسكار إسحاق. إذ بدأ بالحديث عن أجواء العمل معه:
"انت كإنسان لازم يبقى عندك خط فاصل مابين انعدام الثقة والغرور. بمعنى ان أنا أيام جاي قاعد بترعش لأنه ازاي بقول لأوسكار اسحاق وإيثان هوك يمين ولا شمال! وبنفس الوقت لازم يكون عندك ثقة عشان تعرف تقولهم. فساعات كثير أنا عارف ان أنا أحسن واحد للمشروع ده وعندي ثقة بنفسي بس ساعات ببقى مرعوب. في أول كم يوم بالتصوير طبعًا كانو حاجة مرعبة بس حضرت كويس لدرجة اني كنت عارف أعمل ايه بالضبط"
خصصنا بعدها بالحديث عن أختيار أوسكار والحوار خلف ذلك:
"أول مرة كلمني قال لي أنا مش عايز أعمل أي أفلام سوبرهيرو أنا زهقت وعملتها كتير. بس شاف أفلامي فقالي محمد أفلامك هايلة انت بتعمل كده ليه يبني. ليه جاي هنا. قعدنا نتناقش وحاولت أقنعه ان احنا نعمل حاجة أعمق مش بس سوبرهيرو. الحمدلله لما خلصنا قال لي ده أكثر مشروع فخور بيه فحياتي فحسيت انه ما احبطتوش الحمدلله واديته اللي كان هو بيحلم بيه"
تطرق الحديث بعد ذلك عن نجاح المسلسل في العالم والوطن العربي. عبر المخرج عن سعادته الغامرة بسبب ذلك وأنه لم يتوقع هذا القدر من النجاح في منطقتنا:
"أنا كنت سعيد جدًا جدًا. أولًا أنا عندي ثقة في نجاح المسلسل حول العالم, بس ماكنتش متخيل انه العالم العربي حيقدره كده. أنا طبعًا بحب أوي أوي أحط الثقافة بتاعتنا, ودي مش سهل انك تدور ايه من ثقافتنا هيعجب الغرب ودي عايزة ذائقة"
أضاف محمد القصة خلف اختيار أغنية "بتونس بيك" التي لاقت شهرة كبيرة عند الغرب بعد عرض المسلسل:
"أنا فاكر واحنا بنعمل العرض الأولي سارة (زوجة المخرج وأحد منتجي المسلسل) راحت مورياني لوقو مارفل وعليه بتونس بيك أنا قلتلها لما تنزل دي هتقلب الدنيا! وده اللي حصل, انتشرت أكثر من المسلسل"
 |
| Marvel Studios |
بعد تعمقه في الكوميكس وعالم مارفل خلال تجربته المذهلة, فبالتأكيد أصبح لدى محمد آراء حول شخصيات مارفل الأخرى. ولذلك قمنا بسؤاله عن أشرار مارفل المفضلين لديه:
"أنا بحب كيلمونقر وبحب ثانوس لأن أنا بحب الشخصيات الرمادية, مابحبش الأبيض والإسود. بحب الشخصيات اللي عندها منطق. حاولت على قد ما أقدر الشخصية دي (آرثر هارو) وعلى فكرة الشخصية دي مخترعة تمامًا. مارفل تحب كدة نخترع شخصية بعدين نجيب لها اسم. يعني فيه شخصية اسمها آرثر هارو في عالم مون نايت, بس الحقيقة ان الشخصية دي بفكرة انه يمسك الناس ويعرف اللي حوليه الشخصية دي مختلقة من تأليفي أنا وسارة جوهر تمامًا. فأنا كنت فخور جدًا انه هو شخصية عنده منطق, أنا مش بموت حد أنا بموت الأشرار, بموت الناس اللي حيثبت انهم أشرار"
من الأشياء التي حرص طاقم العمل عليها في المسلسل هو تقديم الأفكار الجديدة التي رحب بها محمد دياب. وأحدها كانت الرواية في مشاهد الأكشن:
"فكرة ان انت في وسط الأكشن تعمل كات أسيبك وربنا معاك بقا. دي كانت عاجباني وفكرة عبقرية. من أحلى الحاجات اللي كنت فخور بيها في الأكشن. كده انت بقيتش قادر تروح تاكل, أصل أنا ساعات بزهق من مشاهد الأكشن لأن أنا عارف انها عشر دقايق أروح آكل واجي. خلاص أنا عارف انهم حيضربو بعض والبطل حيكسب. بس هنا في أي لحظة ممكن أي حاجة تحصل"
وبما أن محمد تعمق أكثر في عالم الأبطال الخارقين سألناه عن بطله المفضل خارج عالم مارفل:
"أنا مش بدعي ان أنا عارف كل حاجة, بس أنا من العاشقين لباتمان. نفسي أعمل نظرة مختلفة لباتمان, بأسلوب نوار (Noir). فيلم فيه دراما. كريستوفر نولان خلانا كلنا بقينا شايفين انه فيلم درامي عن واحد عنده مأساه. والنظرة الجديدة (The Batman) حلو جدًا. باتمان أو غيره, فكرة الإنسان اللي عنده قصة إنسانية حقيقية مش بس سوبرهيرو بيطير"
 |
| Marvel Studios |
عاد دياب إلى مارفل لإعطاء مثال حي على أفلام الأبطال الخارقين العظيمة ذو الأهمية الدرامية:
"لما تتفرج على Endgame كان فيها ثمن, لأول مرة انت شايف ثمن وشخصيات بتموت. هم الجزئين على بعض (Infinity War, Endgame) كانو عظيمين. الفيلمين دول كان فيهم ألم, تضحيات, دراما"
اتضح لنا خلال المقابلة عشقه الكبير للأفلام, فماذا لو كان Moon Knight فيلمًا؟
"كان نفسي ده يحصل. أولًا أنا مخرج سينما. الفرق بينها وبين التلفزيون ان أنا اشتغل سنتين وحدي تركيزي على 120 مشهد, فكل مشهد فيهم بتبقى حفظته وعرفته وأكلته وشربته, وأنا مغمض أقولك المشهد ده عبارة عن ايه. بالتلفزيون أنا عملت ألف مشهد, فمهما كنت مذاكر كان بيجي أيام هو انهردا مشهد ايه؟ الموضوع طبيعي. ثانيًا الإنتاج, أنا ميزانيتي كانت فوق الـ150 مليون دولار نفس ميزانية فيلم. بس الميزانية بالأكشن ده اتصرفت على ست ساعات بدل ساعتين. فأنا كان ممكن أعمل قد الأكشن ده عشر مرات بس فى وقت أقل. الحمدلله ده كان ساعتها أغلى مسلسل في تاريخ البشرية. وكنت كل يوم أقولهم ده مش كفاية"
عُرفت مارفل بسريتها التامة خلال فترة الإنتاج لأي عمل وكان لذلك تأثير على تجربة محمد مع مارفل بالتحديد, إلى أي مدى مارفل سرية؟
"أنا معرفش ايه اللي هيحصل في مون نايت بعد المسلسل, عايز أقولك أنه %95 من الممثلين ميعرفش غير مشاهده. ميعرفش أصلًا مسلسل مون نايت ده كان عن ايه. عندك حراس أمن قاعدين طول اليوم, والكمبيوتر بتاعي عليه جهاز بيطلع صوت كل شوي عندي بالبيت. لم يسمح لي بطبع السيناريو الا قبل التصوير بأسبوع. فالموضوع سري لدرجة رهيبة"
 |
| Marvel Studios |
وخلال حديثه في الجزء الأخير من المقابلة, أبدى دياب انبهاره بسلسلة Spider-Man الأنميشن التي تنتجها سوني:
"أنا منبهر بـ Spider-Man: Into The Spider-Verse وده بالنسبة لي أفضل فيلم سوبرهيرو على الإطلاق. والفيلم الجديد حلو أوي بس الأولاني أحلى, دي نظرة جديدة خالص..عظيم!"
وفي سؤالنا الأخير له كمحب لعالم الأبطال الخارقين. ماهو رأي محمد دياب في قيادة جيمس غان لعالم دي سي فنيًا:
"أنا عارف انه فيه ناس مش طايقة جيمس غان, أنا شايفه فنان عظيم وحيعمل شغل عظيم. وبصراحة أنا آسف الفترة اللي فاتت مش عاجبني خالص. آخر فيلم اللي هو Justice League تحسن أوي من النسخة الأولى, بس في الأخير سنايدر في كل الأفلام اللي عملها ماعجبنيش. جيمس غان كل أفلامه عجبتني أكثر. أنا من رأيي انه فنان أكبر بكثير ومؤلف شاطر جدًا وحيعمل شغل ممتاز مع دي سي. أتمنى الناس ما تبقاش قعداله لأنه لو خسر جمهور دي سي حينتهي. بس هو فنان وحيعمل حاجات رائعة"
وأضاف حول اختياره لقصص Guardians of The Galaxy :
"لو جالي انا الكوميكس بتاعت Guardians أنا كنت حقول ايه القرف ده, وطلع منه (جيمس غان) ثلاث أفلام جامدين جدًا. أنا بقولك كمخرج كان لا يمكن يجيلي الكوميك ويبقى عندي نظرة له. فهو طلع من قصص تبدو في منتهى الاستخفاف وطلع منها حاجة دمها خفيف وجميلة جدًا جدًا"
وبذلك تنتهي مقابلتنا الأولى التي أخذتنا في رحلة رائعة خلف كواليس تجربة محمد دياب في عالم مارفل السينمائي. شاركنا رأيك على سيرفر ديسكورد الخاص بنا حول مسلسل Moon Knight وإن كنت تريد موسم آخر من المسلسل.
مقابلة مذهلة عرفت الكثير عن مارفل والمخرج محمد وطريقة الانتاج
ردحذف